1974

Ljósmynd: Halldóra Sigríður

Sigurður Skúlason

     Sigurður Skúlason steig ungur á fjalir Þjóðleikhússins, aðeins tíu ára gamall, í barnaleikritinu Ferðin til tunglsins eftir Gert von Bassewitz árið 1957.  Þá var hann nemandi í Listdansskóla leikhússins. Sigurður útskrifaðist frá Leiklistarskóla Þjóðleikhússins árið 1967 og hefur starfað við leikhúsið alla tíð síðan. Af hlutverkum hans frá fyrri árum má nefna Geoffrey í Hunangsilmi Delaneys, Eugene Marchbanks í Candidu Shaws, Ingham í Malcolm litla eftir David Halliwell, Gratsíanó í Kaupmanni í Feneyjum eftir Shakespeare, Játmund í Lé konungi sama skálds, Stjána í Stalín er ekki hér eftir Véstein Lúðvíksson, Guðmund í Óvitum Guðrúnar Helgadóttur og Böðvar í Milli skinns og hörunds eftir Ólaf Hauk Símonarson.  Þá hefur Sigurður starfað hjá Leikfélagi Reykjavíkur, Grímu, Alþýðuleikhúsinu, unnið margvísleg störf í útvarpi sem leikari, lesari, leikstjóri og dagskrárgerðarmaður og leikið í kvikmyndum og sjónvarpi.  Meðal hlutverka hans á seinni árum má nefna Hollenstæn í Gleðispilinu eftir Kjartan Ragnarsson, Kapúlett í Rómeó og Júlíu Shakespeares, Engstrand smið í Afturgöngum Ibsens, Assessor Brack í Heddu Gabler og Relling lækni í Villiönd sama skálds, Kúlygín í Þremur systrum Tsjekhovs og Gaev í Kirsuberjagarði sama skálds, Friðrik í Laufunum í Toscana eftir Lars Norén, titilhlutverkið í Herjólfur er hættur að elska eftir Sigtrygg Magnason og H.C.Andersen - sögumann í barnaleiknum Klaufar og kóngsdætur.